Tímabundinn Lygavefur

Auðkennislyklar

2007-05-23T11:29:00.000Z

Undirrituðum þykir upp á vanta öryggi heimabanka síns. Nýútgefnir auðkennislyklar eru fjærri því að vera nógu öruggir. Í rauninni sér Undirritaður einungis eitt til í stöðunni.

Til að nota heimabanka sinn þarf viðkomandi að senda inn sæðissýni til viðkomandi banka, með Íslandspósti, með 8 daga fyrirvara. Til baka fær hann svo heimabankaleyfi sem gildir í eina klukkustund, úthlutaða af handahófi. Þetta leyfi gæti verið á formi 100 stafa lykilorðs. Auk þess verður stórvaxinn maður sendur á lögheimili viðkomandi til að votta að ekki sé um sáðstuld að ræða.
Þeir sem ekki geta sent inn sáðsýni geta ekki notað heimabanka.

Þessi þjónusta gæti kostað ca. 20000kr en það er ekkert verð fyrir almennilegt öryggi og þægindi.
Einungis á þennan máta getur heimabankinn verið nægilega öruggur og þægilegur í notkun.

Öryggi og þægindi!

Hví kýs ég ekki: Allir hinir

2007-04-18T13:29:00.000Z

Sjálfstæðisflokkurinn (hljóðlaust)
Íslandshreyfingin (hávaði)
Frjálslyndi flokkurinn (hávaði)
Framsóknarflokkurinn (hljóðlaust)
Aðrir í framboði (hávaði)

Hví kýs ég ekki: Samfylkingin

2007-04-13T14:09:00.000Z

Að fá kvenkonu sem forsætisráðherra væri einfaldlega of mikil skömm fyrir þetta litla land okkar.

Hví kýs ég ekki: Vinstrihreyfingin - Grænt framboð

2007-04-11T08:46:00.000Z

Einhvur þarf að taka sig til og segja Sóleyju Tómasdóttur að þegja. Hún er búin með sitt málfrelsi, fyrir löngu síðan.

Falskt Öryggi

2007-04-04T10:57:00.001Z

Nú til dags er ekki hægt að komast um borð í flugvél án þess að ganga í gegn um hin og þessi hlið og fylgja hinum og þessum reglum um s.k. öryggisgæslu.
Alþjóða samfélagið minnkar hægt og rólega rétt ferðamanna til að ferðast. Fyrst var bannað að hafa fleiri en tvær töskur í handfarangri. Næst var bannað að hafa með sér vatn í brúsa. Svo hafa bretar nýlega tekið upp á því að leyfa manni einungis að hafa með sér einn handfarangur í flug sem fara frá Bretlandi (það er þú í lagi að hafa með sér 2 töskur í flugum til Bretlands enn). Einnig er orðið nauðsinlegt að viðra táfýluna sína í öryggishliðinu. Ekki má vera í jakka í gegnum öryggishliðið heldur.
Allt þetta, og mikið meira til, er hannað til að auka öryggi okkar, hins almenna ferðalangs. Mikið af þessum hömlum koma sem svar við ógn um hryðjuverk um borð í flugvélum.
1) Undirritaður spyr sig hvursu langt hægt er að ganga í að fjarlægja frelsi manns í þeim tilgangi að varðveita þetta sama frelsi áður en téð frelsi er allt glatað.
2) Undirritaður spyr sig hvort eitthvert raunverulegt öryggi hljótist af þessari valdaleikfimi stjórnvalda.
Undirritaður svarar ofangreindum spurningum sínum á einfaldan máta:
Fari öyggisgæsla á flugvöllum í rassgat. Það er komið nóg!
1) Ef ég er látinn fara úr skónum á leið inn í flugvél er bara tímaspursmál hvunær ég verð gegnumlýstur og/eða látinn berhátta mig. Þegar það er svo komið í gagnið er bara eftir að setja upp gúmmíhanskann.
2) Ef einhvur ætlar að framkvæma hryðjuverk gerir hann það, öll heimskuleg lög og öryggisreglugerðir heimsins koma ekki í veg fyrir það. Ef eitthvað verða hryðjuverkin betur úthugsuð (sem ég get ekki ímyndað mér að sé jákvætt)

Það lítur út fyrir að hryðjuverkamenn hafi unnið þann "níunda nóvember" 2001 með glæsibrag.

Endalokin

2007-03-28T02:50:00.000Z

Þá er komið að lokum dvalar minnar hér í Japan. Eftir 1 sólarhring verð ég nýkominn um borð í flugvél JAL (Japan Airlines) á leið til London þar sem ég stoppa í 5 tíma og fer svo með Iceland air beinustu leið til Íslands og lendi að kveldi 29. mars.
Nú er ég að ganga frá herberginu mínu því ég ætla að dvelja mína síðustu nótt í Japan niðri í miðbæ á hólfahóteli (e. capsule hotel), sem eru víst mjög japönsk fyrirbæri.

Mér er miður að tilkynna að litlar líkur eru á að næsti hluti sögunnar um Lothar verði birtur fyrir brottför mína héðan eins og var lofað áður.

Framhaldsörsagan um Lothar Mattheus (7. hluti)

2007-03-14T06:18:00.000Z

... Hurðin opnaðist og það fór hrollur um Lothar þegar Eric áttaði sig á því hver stóð fyrir framan hann og setti upp lúmskt glott því hann vissi hvað var í vændum. Báðir menn stóðu þöglir um stund. Glottið jókst eftir því sem þögnin varð vandræðalegri fyrir Lothar. Að lokum var þögnin brotin "Þarf ég að gera þetta?" sagði Lothar. Eric svaraði engu en glotti meira, benti á jörðina og kinkaði kolli...

Framhaldsörsagan um Lothar Mattheus (Fyrstu sex hlutarnir)

2007-03-14T04:31:00.000Z

Næsti hluti sögunnar um Lothar er alveg að verða tilbúin. Til að gera menn tilbúna eftir svona langa bið munu 6 fyrstu flutarnir birtast hér.

1. hluti
Einu sinni sem oftar var ofur-súper-mega-hetjan Lothar Mattheus kominn í vandræði. Hann hafði gleymt að hlaða geimpakkann sinn og þurfti nauðsynlega að komast til tunglsins, annars mundi ríkissjónvarp þýsku nýlendunnar ekki geta sýnt Villa spætu um kvöldið þar sem spegillinn á tunglinu hafði skekkst. Klukkan var orðin 5 en allar búðir loka klukkan 4 í Þýskalandi og því gat Lothar ekki keypt sér rafhlöður. Nú voru góð ráð dýr...

2. hluti
... Hvað var til ráða? Ekki þurfti Lothar að vekja verzlunar-málaráðherra Þýskalands í þriðja sinn í þessari viku. Hann yrði ekki ánægður. Nei það gengi ekki. En þá datt Lothari snjallræði í hug. Gary Linekar gæti átt fullhlaðinn geimpakka. Lothar skokkaði yfir Holland, Belgíu og Frakkland og synti svo yfir Doversundið og tölti svo yfir að húsinu hans Gary og bankaði. En Mamma hans kom til dyra og sagði að Gary væri í útgöngubanni og mætti hvorki hitta neinn né tala við. Nú voru góð ráð ennþá dýrari...

3. hluti
... Herbergi Garys var uppi á þriðju hæð hússins. Til þess að komast svo hátt upp án þess að einhvur tæki eftir því þurfti Lothar geimpakkan sinn en hann var hleðslulaus. Lothar gekk álútur út heimreiðina, djúpt hugsi. Það var einn kostur til viðbótar en hann var ekki góður, alls ekki góður. Eric Cantona átti geimpakka, betri geimpakka en Gary og Lothar til samans. En Eric var mikill hrokagikkur og Lothar fengi ekki að vera í friði lengi vel ef hann leitaði til Erics...

4. hluti
... Eftir að hafa hugsað málið lengi vel settist Lothar undir tré í garðinum á móti húsi 13 við Viskístræti. Sólin var lágt á lofti og ekki sála á ferð. Lothari var hugsað til aumingja barnanna sem beðið höfðu í heila viku eftir að sjá Villa spætu. Honum var hugsað til barnæsku sinnar. Hvurnig hann settist við viðtækið í hverri viku til að horfa á Villa spætu. Hvurnig honum hefði liðið ef Villi spæta birtist ekki á skjánum heldur bara tunglsnjókoma. Lothar rankaði við sér þegar eitt tár féll af kinn hans niður á handabakið...

5. hluti
... Lothar vissi ekki hvað liðið hafði langur tími en eitt var víst að annað hvort mátti hann til með að laga spegilinn hið snarasta eða geafast upp, játa sig sigraðan og fara í felur að eilífu. Þá var ekkert eftir nema að bíta í eplið súra, ganga skammargönguna og beygja sig undir hvað það er Eric gæti viljað.
Heimili Erics var drungalegt einbýlishús sem alltaf virtsist rigna í kringum. 15 þung skref frá götunni upp að útidyrunum ...

6. hluti
...
"Hvur skyldi þetta vera?" muldraði brúnaþungur maður þegar barið var á hurðina sem stóð í útidyrum hans. Hann lagði frá sér sósupískinn og reyndi að setja skítuga endann fram af eldhúsbekknum til að skíta bekkinn ekki út. Það gekk ekki betur en svo að þegar hann var kominn hálfa leið að útidyrunum féll pískurinn á gólfið með tilheyrandi slurpi og glamri. Það fór hrollur niður eftir hrygg mannsins við tilhugsunina um að þrífa sósuna upp af gólfinu ...

Gleðifregnir

2007-03-01T04:30:00.000Z

Það lítur út fyrir að hin snarvonda hljómsveit Audioslave sé að leggja upp laupana vegna þess að söngvari sveitarinnar (og áberandi lélegasti meðlimur) hefir sagt skilið við hana. Ekki nóg með það heldur munu hinir meðlimir svetiarinnar taka upp samstarf við söngvarann Zach De La Rocha á ný og halda amk. ferna tónleika undir sæmdarheitinu Rage Against the Machine.

Japönsku getraun

2007-02-28T06:17:00.000Z

Japanir rita ensk orð / tökuorð / nöfn útlendinga með sér letri. Í þessu letri vantar mörg af þeim hljóðum sem enskumælandi fólk er mjög vant og verður því mjög fyndið / pirrandi oft á tíðum að reyna að átta sig á hvað þeir eru eiginlega að reyna að skrifa. Þetta téða letur er einnig ástæðan fyrir því að japanir eru nánast allir ófærir um að tjá sig á ensku (hvort sem þeir kunna hana eður ei) sökum þess að öll enska er hér kennd með þessu letri og þannig eru hljóðin sem vantar einfaldlega ekki með á kennsluskrá. Svo bætir það ekkert úr skák að almennt kunna kennararnir ekkert mikla ensku af sömu ástæðu.

Hér að neðan er getraun ekki ólík þeirri sem ég hafði á gamla Lygavefnum (hér). Í þeirri getraun bar Helgi sigur úr bítum eftir langa glímu við kvikmyndanafnið "Oliver Twist".

"surizarrinku" er nafn á talnagátu sem minnir á minesweeper
"fuorubara" er hugtak sem dómari í hafnarboltaleik gæti tekið upp á því að nota
"rappu" hefir tvær gjörsamlega ólíkar merkingar
"kurisuuorisutenhorumu" er tónlistarmaður
"zorilda" er íslenskt kvenmanns nafn
"oranda" er nafn á evrópsku landi
"hottokohi" er drykkur
"hasura" er nafn á tímariti
"hanbaga" er matur
"biggufuroppidonkidikku"

Sá sem fyrstur nær öllum þessum orðum réttum fær verðlaun, líklegt er að þau verði gallaðar vöflur á þriðjudegi.

ES. Næsti hluti í sögunni um Lothar er rétt í þessu að verða tilbúinn.

Enn af hugsunum japana

2007-02-08T05:44:00.001Z

Eitt sinn er við sátum að málsverði ég og mínir skrifstofubræður fékk ég spurn frá einum þeirra. Það lá í augum uppi að hann hafði velt þessu lengi fyrir sér og loksins þorað að spyrja mig, sérfræðinginn um vestræna siði í hópnum.

"Ef þið notið ekki prjóna til að matast á Ísland, hvurnig farið þið þá eiginlega að því að fjarlægja beinin úr fisknum?"

Aðskotahlutur í stafrænum ristli

2007-02-07T06:42:00.000Z

Það lítur út fyrir að vírus hafi náð að læða sér í tölvu Undirritaðs. Gæti hann kennt hinu og þessu um en ákveður þó að taka á sig sökina sjálfan þar sem hann veit hvunær og hvurnig vírusinn kom í vélina. Það er vonandi að nægilegt reynist að fletja út harða diskinn með stafrænu straujárni til að losna við þessa pest.

Einu sinni áður hefir vírus náð að ógna öryggi tölvu Undirritaðs. Var það frægur vírus á þeim tíma sem erfitt var að fjarlægja en hann tók upp á því 26. apríl hvers árs að henda öllum upplýsingum sem á harða disknum voru, þ.m.t. stýrikerfinu og persónulegum skrám. Ekkert mikilvægt tapaðist þegar gögnin fórust en Undirritaður fékk hinsvegar spark í rassinn þar sem engin vírusvörn hafði verið í vélinni marga mánuði enda hún ekki tengd netinu.

Að öllu óbreyttu ...

2007-02-06T07:05:00.000Z

kem ég heim til Íslands eftir 50 daga
mun ég horfa á hljómsveitina Tool leika list sína eftir 2 daga
munu sokkar mínir verða illa lyktandi að lokum þessa dags, þar sem ég heif ekki haft fyrir því að fara úr skónum mínum lengi vel
birtist næsti kafli framhaldsörsögunnar um Lothar á næstu dögum
dettur mér ekkert fleira í hug til að skrifa á þennan lista
sofna ég ef ég held áfram að þykjast vinna í dag

Svona hugsa japanir

2007-01-31T07:09:00.000Z

Eftirfarnadi sagði ungur japani mér, reyndar í ölæði en hafði líkast til engu að síðar lagt nokkra hugsun í.
"Japanir eru með minni typpi en aðrir en bæta svo sannarlega upp fyrir það með því að verða miklu harðari en aðrir"
Þetta sagði umræddur drengur með talsverðu stolti í viðurvist kvenmanns.

Síðar sama kveld má vera að Undirritaður hafi leyst niður um sig brækurnar. Getur hann hvorki staðfest né hrakið hvoruga kenninguna.

Völva Lygavefsins 2007

2007-01-22T01:48:00.000Z

Menn munu muna eftir árinu 2007 langt fram á árið 2008.

Veður mun valda usla í mannlífinu. Vegna veðurs mun fólk eiga erfitt með samgöngur og jafnvel samræður. Enn fremur mun veðrið verða valdur ýmissa samræðna manna.

Pólitík mun fanga huga margra á árinu og munu margir taka þátt í umræðum um pólitík. Ólíklegt fólk mun koma fram á sjónarsvið umræðna og líklegt fólk mun draga sig til hlés. Öruggt er að fólk og dýr munu deyja vegna ákvarðana stjórnmálamanna en ólíklegt er að steinar muni vakna til lífsins.

Nýjar uppfinningar munu hjálpa mörgum og gera einföld verk úreld.

Deilur eiga eftir að standa um vegarstæði og vegagerð í heild sinni. Munu heimamenn leggja fram formleg mótmæli oftar en einu sinni og jafnvel hlekkja sig við jarðýtur.

Lögregla mun myrða mótmælendur og mun það verða fréttamál.

Fólk mun deyja en fleiri munu fæðast.

Fyrsta færsla á tímabundnum stað

2007-01-18T07:44:00.000Z

Ég hefi hug á að halda Lygavefnum gangandi þrátt fyrir bilanir í honum því er ég búinn að útbúa þennan nýja Lygavef á meðan nýr Lygavefur er útbúinn. Von er á nýrri útgáfu vor 2007 en búast má við nokkuð reglulegum færslum hér þangað til.

Gamalt efni má nálgast á http://www.hi.is/~jbm/?site=blog00.

VIÐBÓT: Ég biðst afsöknuar á hversu einkennilega dagsetningar eru birtar á þessari heimasíðu en kerfið er sjálfvirkt og býðir ekki upp á þær stillingar sem undirrituðum þykja bestar.